MKAAZI WA WILAYA YA MICHEWENI PEMBA BAKAR HAJI FAKI (20) AMEJINYONGA NDANI YA NYUMBA YAKE ANAYOISHI .

MKAAZI wa kijiji cha Chamboni Shehia ya  Wilaya ya Micheweni Pemba  Bakar  Haji  Faki  (20)  amekutwa akiwa amejinyonga kwa kutumia kamba ndani ya nyumba yake anayoishi .

Wakizungumza na mwandishi wa habari hizi baadhi ya mashuhuda wa tukio hilo walisema limetokea usiku wa Jumatano majira ya saa tatu , ambapo walimkuta akiwa amejitundika na tayari amefariki dunia .

Ali Massoud Kombo Mkaazi wa Micheweni aliliambia Gazeti hili kwamba tukio limeshangaza wengi kwani kabla ya kifo hicho kijana huyo hakuwahi kusumbuliwa  na chembe za ugonjwa .

“Ni tukio ambalo limetushangaza vijana  wengi  ,kwani kijana mwenzetu  hakukuwa na taarifa yoyote ya kusumbuliwa na ugonjwa wowote  ”alifahamisha Ali Massoud Kombo .

Naye Kai Daud  akizungumzia kifo hicho alisema kwamba kiliwashitua kwani kabla ya kutokea walikuwa pamoja  na marehemu katika vijiwe /maskani zao wakijadili masuala ya kujipatia kipato .

Alisema kimetokea hatuna budi kushukuru kwani itakuwa  ni mipango ya Mungu , kilicho baki na kumuombea mwenzetu ambaye tayari ametutangulia .

Tukio hilo pia limethibitishwa na kamanda wa Polisi Mkoa wa Kaskazini Pemba Kamshina Msaidizi Mwandamizi Hassan Nassir Ali na kusema kwamba uchunguzi  bado unaendelea ili kubaini chanzo cha kifo hicho .

Alisema kwamba uchunguzi wa awali umethibitisha kwamba kijana huyo  amefariki kwa kijitundika ndani ya nyumba (geto)  yake ya kuishi  na alionekana na jamaa zake akiwa tayari amefariki dunia .

“Ni kweli hili tukio limetokea na jeshi la Polisi bado linaendelea kufanya uchunguzi ili kubaini hasa nini chanzo cha kifo hicho , lakini uchunguzi wa awali umebaini kwamba amejinyonga kwa kutumia kamba ”alifahamisha.

Hata hivyo kamanda Nassir alisema ni vyema wananchi kujenga utaratibu wa kutafuta ushauri juu ya mambo ambayo yanawatatiza , kwani sio vizuri kuchukua maamuzi ya kuidhulumu nafsi .